| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 18.227 | Dem. 18.230 (English) | >>Dem. 18.233 |
18.229καὶ μὴν ὅτι γʼ οὐ δίκαια λέγει μεταθέσθαι ταύτην τὴν δόξαν ἀξιῶν , ἐγὼ διδάξω ῥᾳδίως , οὐ τιθεὶς ψήφους (οὐ γάρ ἐστιν ὁ τῶν πραγμάτων οὗτος λογισμός ), ἀλλʼ ἀναμιμνῄσκων ἕκαστʼ ἐν βραχέσι , λογισταῖς ἅμα καὶ μάρτυσι τοῖς ἀκούουσιν ὑμῖν χρώμενος . ἡ γὰρ ἐμὴ πολιτεία , ἧς οὗτος κατηγορεῖ , ἀντὶ μὲν τοῦ Θηβαίους μετὰ Φιλίππου συνεμβαλεῖν εἰς τὴν χώραν , ὃ πάντες ᾤοντο , μεθʼ ἡμῶν παραταξαμένους ἐκεῖνον κωλύειν ἐποίησεν ·
18.230ἀντὶ δὲ τοῦ ἐν τῇ Ἀττικῇ τὸν πόλεμον εἶναι , ἑπτακόσια στάδιʼ ἀπὸ τῆς πόλεως ἐπὶ τοῖς Βοιωτῶν ὁρίοις γενέσθαι · ἀντὶ δὲ τοῦ τοὺς λῃστὰς ἡμᾶς φέρειν καὶ ἄγειν ἐκ τῆς Εὐβοίας , ἐν εἰρήνῃ τὴν Ἀττικὴν ἐκ θαλάττης εἶναι πάντα τὸν πόλεμον · ἀντὶ δὲ τοῦ τὸν Ἑλλήσποντον ἔχειν Φίλιππον λαβόντα Βυζάντιον , συμπολεμεῖν τοὺς Βυζαντίους μεθʼ ἡμῶν πρὸς ἐκεῖνον .
18.231ἆρά σοι ψήφοις ὅμοιος ὁ τῶν ἔργων λογισμὸς φαίνεται ; ἢ δεῖν ἀντανελεῖν ταῦτα , ἀλλʼ οὐχ ὅπως τὸν ἅπαντα χρόνον μνημονευθήσεται σκέψασθαι ; καὶ οὐκέτι προστίθημι ὅτι τῆς μὲν ὠμότητος , ἣν ἐν οἷς καθάπαξ τινῶν κατέστη κύριος Φίλιππος ἔστιν ἰδεῖν , ἑτέροις πειραθῆναι συνέβη , τῆς δὲ φιλανθρωπίας , ἣν τὰ λοιπὰ τῶν πραγμάτων ἐκεῖνος περιβαλλόμενος ἐπλάττετο , ὑμεῖς καλῶς ποιοῦντες τοὺς καρποὺς κεκόμισθε . ἀλλʼ ἐῶ ταῦτα .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 18.227 | Dem. 18.230 (English) | >>Dem. 18.233 |
